நோர்வுட் மைதான நிர்வாக மாற்றத்துக்கு எதிர்ப்பு

நோர்வுட் விளையாட்டு மைதானம் சௌமியமூர்த்தி தொண்டமான் ஞாபகார்த்த மன்றத்தின் கீழ் செயல்பட்டு வருகின்றது. இவ்விளையாட்டு மைதானத்தை மன்றத்தின் நிர்வாகத்திலிருந்து பிரித்து நோர்வுட் பிரதேச சபையின் கீழ் கொண்டுவர முயற்சிகள் நடந்து வருவதாக தகவல்கள் தெரிவிக்கின்றன.

இது தொடர்பாக கருத்து தெரிவிக்கையிலே, இம்மாற்றம் ஒருபோதும் ஏற்றுக்கொள்ள முடியாது என இலங்கை தொழிலாளர் காங்கிரஸின் பிரதித் தலைவர் கணபதி கனகராஜ் தனது அறிக்கையில் வலியுறுத்தியுள்ளார்.

சௌமியமூர்த்தி தொண்டமான் ஞாபகார்த்த மன்றத்தின் செயல்பாடுகள்
மலையக மக்களுக்காக சேவையாற்றும் நினைவாக உருவாக்கப்பட்ட இந்த மன்றம், நோர்வுட் விளையாட்டு மைதானம், ஹட்டன் தொழிற்பயிற்சி நிலையம், மற்றும் ரம்பொடை கலாசார மையம் போன்ற அமைப்புகளை நிர்வகிக்கிறது. இதற்கான நிதி அரசாங்க திறைச்சேரி மூலம் நேரடியாக வழங்கப்படுகிறது.

இந்த அமைப்புகள் மூலம் பல ஆயிரம் மலையக இளைஞர், யுவதிகள் பயனடைந்து வருகின்றனர். இந்நிலையில், விளையாட்டு மைதானத்தை பிரித்து வேறு அமைப்பின் கீழ் கொண்டுவரும் முயற்சிகள் மலையக மக்களின் உணர்வுகளை பாதிக்கக்கூடும்.

மலையக மக்களின் எதிர்ப்பு
சௌமியமூர்த்தி தொண்டமான் என்பவர் மலையக மக்களின் நினைவில் அழியாத இடத்தை பிடித்துள்ளார். அவரது பெயரால் செயல்படும் எந்த நிறுவனத்தையும் மாற்றமோ, இணைப்போ மேற்கொள்ள மலையக மக்கள் கடுமையாக எதிர்ப்பு தெரிவிப்பார்கள் என கணபதி கனகராஜ் கூறியுள்ளார்.

அத்துடன், இதற்கு முன்பாக தொடக்கப்பட்ட பெயர் மாற்ற முயற்சிகள் பல்வேறு அளவிலான கண்டனங்களை சந்தித்ததை அரசு நினைவில் கொள்ள வேண்டும் என்றும் அவர் தெரிவித்தார்.

இவ்விளையாட்டு மைதானத்தை பிரித்து நோர்வுட் பிரதேச சபையுடன் இணைக்கும் முயற்சிகளை அரசாங்கம் உடனடியாக கைவிட வேண்டும் என கண்டன அறிக்கையில் அவர் வலியுறுத்தியுள்ளார்.